الحرية للدكتور أمير بسام

بكرة جلسة المحكمة العسكرية وعلى فكرة أنا مش هروح لأسباب خاصة لكن عارفة إيه إللى هيحصل بالظبط عارفة القاضى هيقول إيه وعارفة الشهود هيقولوا إيه وعارفة الدفاع هيقول إيه الحاجة الوحيدة إللى أنا مش عارفاها هما بيعملوا كده ليه يعنى لما الحكاية كلها مطبوخة والقضية من الأساس سياسية وفيها بعض من تصفية الحسابات وبما إن السلطة فى إيديهم ومفيش حد بيقول إنتوا بتعملوا إيه ومفيش حد بيحاسب والشعب فى سبات عميق الله أعلم هيفوق منه إمتى ومعظم الصحافة تسبح بحمد النظام وإللى بيتكلم بيكون جزاؤه السجن ومنظمات حقوق الإنسان كل دورها الشجب والندب والمؤتمرات الصحفية يبقى ليه تعبين نفسهم وتعبنا معاهم وعاملين المسرحية البايخة دى إللى أقل حاجة تتقال عنها إنها هزلية ومملة أكيد هما مش خايفين من الرأى العام إللى هيثور لو حس إن العدالة لم تإخذ مجراها ولا من الولايات المتحدة إللى هتعلن غضبها على النظام المصرى لإنه إعتقل قيادات الإخوان المسلمين

عشان كده بقولهم مفيش داعى للتمثيلية دى ولا للمصاريف إللى بتصرفوها فى بنزين عربيات الترحيلات وغيرها من الديكورات صحيح هى من فلوسنا (أصل الظريف إنهم بيحاكمونا بفلوسنا ) بس برضه وفروا على نفسكوا لسه أحفادكوا محتاجين مصاريف ومافيش حد ضامن الزمن ولأنى بجد زهههههههههههقت منكم